2015年11月7日 星期六

嚇破膽

呢幾個星期真係俾哈碌嚇破膽呀!

話說10月18日,一個晴朗既早上,因為太陽太曬,於是我落左窗簾,而平時綁住窗簾拉繩既尼龍絲帶就放左喺窗台…好快就俾哈碌發現左條絲帶,佢敏捷地跳上窗台,擔走左條絲帶黎咬,好在我及時發現,攞走條絲帶…但條絲帶已經沾滿口水喇…於是我就攞左條絲帶入廁所洗,洗完放左喺洗手盆旁邊…呢個時候哈碌爸就入廁所沖涼,我諗住等佢沖完涼先收返好條絲帶啦~

點知…說時遲那時快,條絲帶唔見左喇…其實九成九都係俾哈碌食左架喇,但又乜都做唔到,唯有等佢自然排出啦!

但過左幾日,哈碌都冇乜異樣,直至星期三見佢嘔過一次,星期日又嘔一次,都發現唔到條絲帶,而且仲變得冇乜胃口,連佢最愛既零食餅餅都唔食…於是我地就帶佢睇醫生啦~照左x-ray, 冇異物發現喎…吓? 唔係佢食左? 冇奶油架喎…但醫生話發現佢個肺有白色陰影,懷疑係肺炎…吓? 肺炎? 醫生話嘔完有機會“濁”到都會引致肺炎喎…其實我都半信半疑,但果刻只好相信醫生…見到哈碌呼吸得好急,返到屋企仲伸埋脷,真係好擔心…

結果,就要食足一星期抗生素

第一次用呢種餵藥器…有d難度


基本上呢個禮拜哈碌,每日都要餵佢食烚雞同醫生開既腸胃肉醬罐頭,因為少爺仔唔餵就唔肯食,有時食得多d,有時食得少…但已經比平時既食量少左好多,便便亦由每日一次,變成兩日一次…

直至噚日11月6日,放工返黎終於見到佢嘔返條絲帶出喇! 我仲要了開d嘔吐物confirm下係咪真係成條絲帶完整嘔返出黎先安心

哈碌嘔完,似乎真係舒服返晒,胃口都返番黎,肯自己食雞同食餅喇! 真係一天都光晒!

今次要哈碌仔仔受苦真係好心痛,亦都好大教訓,所以我喺呢度提醒自己同各位貓奴,要小心收好所有絲帶,繩子,條狀物體先得喇!

希望哈碌快d食返多d野,肥肥白白,健健康康啦!

8 則留言:

  1. 好彩嘔番出黎,如果知道貓地係會食啲條狀嘢,就一定要小心

    回覆刪除
    回覆
    1. 我養左廿幾年貓都從未試過呢~ 今次真係太大意喇...好彩嘔返出黎冇乜大礙....以後一定要小心

      刪除
  2. 真係好彩, 咁其實醫生照到嘅係唔係條絲帶呀??

    回覆刪除
    回覆
    1. 醫生話照唔到異物喎....真係奇...

      刪除
  3. 好好彩,嘔番出黎,安楽晒!
    上次妙妙吞繩又系,嚇到我C,第4日先痾出黎,當時e生話,不是金屬,未必照得出架

    回覆刪除
    回覆
    1. 哈碌足足等左成兩星期先嘔出黎呀~~ 張x光淨係見到佢個肺, 小腸, 大腸, 便便同脂肪...我又冇問點解唔見個胃喎...

      刪除
  4. 好彩冇事,佢嘔番出黎咋,真係擔心C人啦
    但點解醫生會照唔到架?

    回覆刪除
    回覆
    1. 醫生話係睇"密度", 睇唔出有異物...張x光淨係見到佢個肺, 小腸, 大腸, 便便同脂肪...我又冇問點解唔見個胃喎...真係好擔心呢~

      刪除